اسلامی معلومات

اسلامی معلومات 

رسول اللہ ﷺ کی حیات مبارکہ سے متعلق سوال جواب کی روشنی میں معلومات کاذخیرہ

مرتب : مفتی محمد آصف اقبال قاسمی 

سوال         ہمارے پیارے نبی حضرت محمد  ﷺ  کب پیدا ہوئے؟

جواب         ہمارے پیارے نبی حضرت محمد  ﷺ 12 / ربیع الاول  ۲ ۲  /اپریل                571 ء برو زسوموار پیداہوئے۔

سوال         آپ  ﷺ  کے والد ماجد کانام کیا تھا؟

جواب        آپ  ﷺ  کے والد ماجد کانام عبد اللہ تھا۔

سوال         آپ  ﷺ  کی والدہ ماجدہ کانام کیا تھا؟

جواب        آپ  ﷺ  کی والدہ ماجدہ کانام آمنہ تھا۔

سوال         آ پ  ﷺ  کے دادا کا نام کیاتھا؟ 

جواب        آپ  ﷺ  کے دادا کا نام عبد المطلب تھا۔

سوال         آپ  ﷺ  کے نانا کا نام کیا تھا؟

جواب         آ پ  ﷺ  کے نانا کا نام وھب تھا۔

سوال         آپ  ﷺ  کی نانی کا نام کیا تھا؟

جواب        آپ  ﷺ  کی نانی کانام برّہ تھا۔

سوال         آپ  ﷺ  کے کے کتنے چچا تھے؟ اوران کے نام کیا ہیں؟

جواب         آپ  ﷺ  کے گیارہ چچا تھے جن کے نام یہ ہیں 

                ۱؎                 ابولہب         ۲؎             عباسؓ            ۳؎           حمزہ ؓ             ۴؎             زبیر             ۵؎             ضرار            ۶؎               حارث

  ۷ ؎             حجل              ۸؎          ابوطالب        ۹؎           قثم             10؎             مقوم             ۱۱؎            غیداق

سوال         آپ  ﷺ  نے کتنی عورتوں کادودھ پیا ان کے نام کیا ہیں؟

 جواب       آپ  ﷺ  نے تین عورتوں کا دودھ پیا۔                 

                ۱؎                والدہ حضرت آمنہ            ۲؎            حضرت ثویبیہ                  ۳؎             حضرت حلیمہ سعدیہ

سوال         ا ٓپ  ﷺ  حضرت حلیمہ کی پرورش میں کتنے دن رہے؟

 جواب       آپ  ﷺ  حضرت حلیمہ کی پرورش میں چار سال رہے۔

سوال         آپ  ﷺ  اپنی والدہ ماجدہ کے پاس کتنے دن رہے؟

 جواب       آپ  ﷺ  ا پنی والدہ کے ساتھ دو سال رہے۔

سوال         آپ کی والدہ کا انتقال کب ہوا؟

 جواب       آپ  ﷺ  جب چھ سال کے ہوئے تو آپ ﷺ کی والدہ  کاانتقال  ہوگیا۔

سوال         والدہ کے بعد آپ ﷺ کس کی پرورش میں رہے؟

جواب        والدہ کے بعد آپ دادا عبدالمطلب کی پرورش میں رہے۔

سوال          آپ ﷺ عبدالمطلب کی پرورش میں کتنے دن رہے؟

جواب        آپ ﷺ عبد المطلب کی پرورش میں دو سال رہے۔

سوال         داداکے انتقال کے وقت آپ کی عمر کیا تھی؟

 جواب       دادا کے انتقال کے وقت آپ کی عمر شریف آٹھ سال کی تھی۔ 

سوال         دادا کے بعد آپ کس کی پرورش میں رہے؟

جواب        دادا کے بعد آپ ﷺ اپنے چچا ابو طالب کی پرورش میں رہے

سوال         ملک شام کا پہلا سفر آپ ﷺ نے کس عمر میں کیا؟

جواب        ملک شام کاپہلا سفر آپ ﷺ نے بارہ سال کی عمر میں کیا۔

سوال          ملک شام کی سفر میں آپﷺ کے نبوت کی بشارت کس نے دی؟

 جواب       بحیر انامی ایک عیسائی راھب نے آپﷺ کو نبوت کی بشارت دی۔

سوال         جنگ فجار کے وقت آپ کی عمر کتنی تھی؟

جواب        جنگ فجار کے وقت آپ ﷺ کی عمر پندرہ سال تھی۔

سوال         اس لڑائی میں آپ ﷺ کے ذمے کون ساکام تھا۔

جواب        اس لڑائی میں آپ ﷺ اپنے چچوں کو تیر اٹھا اٹھا کر دیتے تھے۔

سوال         شام کے دوسرے سفر میں کس نے آپ ﷺ کو نبوت کی بشارت دی ؟

جواب        شام کے دوسرے سفر میں نسطورا نام کے ایک راھب نے  آ پ  ﷺ کو نبوت کی بشارت دی۔

سوال         ملک شام کے دوسرے سفر مین آپ ﷺ کے ساتھ کون کون تھے؟

جواب        ملک شام کے دوسرے سفر میں آپ ﷺ کے ساتھ حضرت خدیجہ کے غلام میسرہ اور انہیں کے ایک عزیز خزیمہ ابن حکیم تھے۔

سوال         حضرت خدیجہ نے نکاح کا پیغام کس کے ہاتھ بھیجا؟

جواب        حضرت خدیجہ نے نکاح کا پیغام نفیسہ نامی ایک عورت کے ہاتھ بھیجا۔

سوال         حضرت خدیجہ کے ساتھ آپ کا نکاح کس نے پڑھایا؟

جواب        حضرت خدیجہ کے ساتھ آپ کا نکاح حضرت ابوطالب نے پڑھا یا۔

سوال         نکاح کے وقت آپ کی عمر شریف کیا تھی؟اور حضر ت خدیجہ کی عمر کیاتھی؟

جواب        نکاح کے وقت آپ ﷺ کی عمر شریف پچیس سال تھی اورحضرت خدیجہ کی عمر چالیس سال تھی۔

سوال         مکہ والے آپ ﷺ کو کس لقب سے پکارتے تھے؟

جواب        مکہ والے آپ ﷺ کو صادق اور امین کے نام سے پکارتے تھے۔

سوال         قبائل قریش نے آپﷺ کو کس بات کا حَکَم بنایا؟

جواب        خانۂ کعبہ کی تعمیر کے وقت حجر اسود کو اپنی جگہ پررکھنے میں قبائل قریش  کااختلاف ہوگیا ہرشخص یہ شرف خود حاصل کرناچاہتا تھااسی سلسلہ میں آپ کوحَکَم بنایا گیا۔

سوال         اس وقت آپ کی عمر کتنی تھی؟

جواب         اس وقت آپ ﷺ کی عمر35 سال تھی۔

سوال         خلوت گزینی کا شوق آ پ ﷺ کو کس عمر سے پیدا ہوا؟

جواب         خلوت گزینی کا شوق آپﷺ کو بتیس یا تینتیس سال کی عمرمیں پیداہوا۔

سوال          عبادت کی غرض سے آپ ﷺ کہا ں تشریف لے جاتے تھے؟

جواب        عبادت کی غرض سے آپ ﷺ غار حرا میں تشریف لے جاتے تھے۔

سوال         غار حراکیاہے اور کہاں ہے؟

جواب        مکہ سے تین میں کے فاصلہ پرحرا ء ایک پہاڑ ہے اس کے اندر ایک کھوہ ہے جس کوغار حراء کہتے ہیں۔

سوال         جبل حرا کو آج کیا کہتے ہیں؟

جواب        جبل حراکو آج جبل نو ر کہتے ہیں۔

سوال           غار حراء کی لمبائی چوڑائی کیا ہے؟

جواب         غار حراء کی لمبائی چار گز اور چوڑائی پونے دو گز ہے۔

سوال         غار حراء میں آپ ﷺ نے کتنے دنوں تک عبادت کی۔

جواب        سات  سال تک آپ ﷺ نے غار حراء میں جا جا کر عبادت کی۔

سوال           اللہ نے آپ ﷺ کو نبی کب بنایا؟

جواب        جب آپ ﷺ کی عمر شریف چالیس سال کی ہوگئی تو اللہ نے آپ کونبی بنایا۔

سوال         آپ پر سب سے پہلی وحی کہاں نازل ہوئی؟

جواب        آپ ﷺ پرسب سے پہلی وحی غار حراء میں نازل ہوئی؟

سوال          آپ ﷺ پرسب سے پہلی قرآن کی کون سی آیتیں نازل ہوئیں؟

جواب        آپ ﷺ پر سب سے پہلے سور اقراء کی پانچ آیتیں نازل ہوئیں۔

سوال          جب پہلی بار آپ پر وحی نازل ہوئی تو آپ کی کیا حالت ہوئی 

جواب        جب آپ ﷺ پرپہلی بار وحی نازل ہوئی تو آپ گھبرائے  ہوئے گھر تشریف لائے۔

سوال         آپ ﷺ کی حالت دیکھ کر حضرت خدیجہ ؓ آپ کو کہاں لے گئیں؟

جواب        آپ ﷺ کی حالت دیکھ کر حضرت خدیجہؓ  آپ کو ورقہ ابن نوفل کے پاس لے گئیں۔

سوال         تمام حالات سن کر ورقہ نے کیا کہا؟

جواب        تمام حالات سن کر ورقہ نے کہا کہ یہ وہی ناموس اکبر ہے جو مو سیٰ  ؑ پراتراتھا کاش میں جوان ہوتااور اس وقت تک زندہ رہتا جب تمہاری قوم تم کو نکال دے گی۔

سوال            جب آپ  نے تبلیغ کا کام شروع کیا تو پہلے دن کون کون ایمان لائے؟

جواب        جب آپ نے تبلیغ کاکا م شروع کیا تو پہلے دن حضرت خدیجہ ؓحضرت زید ؓ اور حضرت ابوبکر صدیق ؓ ایمان لائے۔

سوال          خاموش تبلیغ آپ ﷺکتنے دنوں تک کرتے رہے؟

جواب        آپ ﷺ تین سال تک خاموش تبلیغ کرتے رہے۔

سوال         آ پ ﷺ کس کے مکان کو بطور درس گاہ استعمال کرتے تھے۔

جواب        آ پ ﷺ ارقم ابن ارقم کے مکان کو بطور درس گاہ استعمال کرتے تھے

سوال         دار ارقم میں آپ ﷺ کب تک اسلام کی تعلیم دیتے رہے؟

 جواب       نبوت کے چھٹے سال تک آ پ ﷺ دار ارقم میں تعلیم وتبلیغ کاکام کرتے رہے۔

سوال         آ پ ﷺ نے اعلانیہ تبلیغ کا کام شروع کیا تو قریش نے کیارویہ اختیار کیا؟

جواب        جب آ پ ﷺ نے اعلانیہ تبلیغ کاکام شروع کیاتو قریش نے سخت مخالفت کی۔ آ پ کو اور آپ ﷺ کے ماننے والوں کوسخت ایذائیں پہونچائیں۔

سوال         جب کفار کی زیادتیاں حد سے زیادہ بڑھیں تو آپ ﷺ نے کیا کیا؟

جواب          جب کفار کی زیادتیاں حد سے زیادہ بڑھ گئیں تو آپﷺ نے مسلمانوں کو ملک حبش جانے کی اجازت دے دی۔

سوال         ملک حبش کی طرف سب سے پہلے کتنے مسلمانوں نے ہجرت کی؟

جواب        ملک حبش کی طرف سب سے پہلے پندرہ مسلمانوں نے ہجرت کیا جن میں گیارہ مر د اورچارعورتیں شامل تھیں۔

سوال          مسلمانوں اور بنو ہاشم کامقاطعہ کب شروع ہو ا؟

جواب        نبوت کے ساتویں سال محر م سے مسلمانوں اوربنو ہاشم کامقاطعہ شروع ہوا۔

سوال         مقاطعہ کے درمیان مسلمان اور بنو ہاشم کہاں رہے؟

جواب        مقاطعہ کے درمیان مسلمان اور بنو ہاشم شعب ابی طالب میں محصور ہوگئے۔

سوال         شعب ابی طالب میں بنی ہاشم اور اورمسلمان کتنے دن رہے؟

جواب        شعب ابی طالب میں بنی ہاشم اورمسلما ن تین سال رہے۔ 

سوال           یہ مقاطعہ کیسے ختم ہو ا؟

جواب         قریش نے جو معاہدہ لکھا تھا اس کو دیمک چاٹ گئی جس کی وجہ سے معاہدہ منسوخ ہو گیا۔

سوال         عام الحزن کس سال کو کہتے ہیں؟

جواب        نبوت کے دسویں سال کو عام الحزن کہتے ہیں۔

سوال         اس سال کو عام الحزن کیوں کہتے ہیں؟

جواب         اس سال حضور ؐ کے چچا اور آپ کی بیوی حضرت خدیجہ ؓکا انتقال ہوگیااس لئے اس سال کو عام الحزن کہتے ہیں۔

سوال          طائف کا سفر آ پ ؐ نے کب کیا کیا؟

جواب          10  نبوی میں آپ ؐ نے طائف کا سفر کیا۔

سوال           طائف کے سفر میں آپؐ کے ساتھ کون تھے؟

جواب         طائف کے سفر میں آپ ؐ کے ساتھ حضرت زید ابن حارثہ تھے 

سوال         طائف کے سفر میں آپ ؐ نے کن لوگوں کو اسلام کی دعوت دی؟

جواب        طائف کے سفر میں آپ ؐ نے پہلے قبیلہ بنی بکر پھر قوم قحطان اوراہل طائف کو دعوت اسلام دیا۔

سوال         طائف والوں نے آپ کے ساتھ کیا رویہ اختیار کیا؟

جواب        طائف والوں نے آپ ؐ کے ساتھ نہایت بد اخلاقی کامظاہر ہ کیا۔

سوال         طائف  سے واپسی میں آپ ؐ نے کس کے  باغ میں قیام کیا؟

جواب        طائف سے واپسی میں آپ ؐ نے عتبہ ابن ربیعہ کے باغ میں قیام کیا۔

سوال          عتبہ نے آپ کے ساتھ کیا برتاؤکیا؟

جواب        عتبہ نے عربی شرافت کے تقاضے سے  اپنے  غلام عداس کے ہاتھ انگور کے خوشے پیش کئے۔

سوال         عداس کہاں کا رہنے والا تھا؟

جواب        عداس نینوا کا رہنے والا تھا۔

سوال         حضرت عائشہ سے آپ ؐ نے نکاح کب کیا؟

جواب        شوال 10   نبوی میں آ پ ؐ نے حضرت عائشہ ؓ سے نکاح کیا۔

سوال         سودہ بنت زمعہ سے آپ کا نکاح کب ہوا؟

جواب         شوال 10 نبوی  میں ا ٓپ کا نکاح سودہ بنت زمعہ سے ہوا۔

سوال           مدینہ والوں میں سب سے پہلے کون لوگ ایمان لائے؟

جواب          مدینہ والوں میں سب سے پہلے یہ لوگ ایماان لائے۔

                 ۱؎              اسد ابن زرارہ                 ۲؎            عوف ابن حارث              ۳؎              رافع ابن مالک                                ۴؎               قطبہ ابن عامر

 ۵؎              جابر ابن عبد اللہ              ۶؎              عقبہ ابن عامر

سوال         مدینہ والے کس سال ایمان لائے؟

 جواب           ۱۱   ؁ نبوی میں مدینہ والے ایمان لائے۔

سوال         ان چھ آدمیوں کی محنت سے اگلے سال کتنے لوگ ایمان لائے؟

جواب        ان چھ آدمیوں کی محنت سے اگلے سال سا ت آدمی ایمان                لائے۔

سوال         ان کے نام کیا ہیں؟

جواب           ۱؎              معاذ ابن حارث                 ۲ ؎          ذکوان ابن عبد قیس         ۳؎              خالد ابن مخلد                                  ۴؎       عبادہ ابن صامت

                 ۵؎              عباس بن عبادہ                 ۶؎              ابو الہیثم ابن النیہان           ۷؎               عویم ابن ساعدہ

سوال          آپ ؐ مدینہ والوں کے ساتھ مبلغ بنا کر کس کوروانہ کیا؟

جواب         آپ ؐنے مصعب ابن عمیر ؓ کو مدینہ والوں کے ساتھ مبلغ بنا کر روانہ کیا۔

سوال          مصعب ابن عمیر نے کس کے مکان پر قیام کیا؟

جواب          مصعب ابن عمیر نے اسعد ابن زرارہ کے مکان پر قیام کیا۔

سوال         مصعب ابن عمیر ؓ اگلے سال مدینہ سے کتنے لوگوں کو لے کر مکہ کی طرف روانہ ہوئے۔

جواب        مصعب  ابن عمیر اگلے سال 72 مر دواور دو عورتوں کولے کر مدینہ روانہ ہوئے۔

سوال         ان کوگوں نے حضور سے کہاں ملاقات کی؟

جواب        ان لوگوں نے آپ ؐ سے عقبہ کی گھاٹی میں سے ملاقات کی۔

سوال         ان لوگوں نے آپ ؐسے کیا درخواست کی ؟

جواب        ان لوگوں نے آ پ ؐ سے مدینہ چلنے کی درخواست کی۔

سوال         عقبہ کی گھاٹی میں آپ ؐ  کس کے ساتھ گئے؟

جواب        عقبہ کی گھاٹی میں آپ ؐ حضرت عباس ؓ کے ساتھ تشریف لے گئے۔

سوال         آپ ؐ نے ان لوگوں میں سے کن لوگوں کو نقیب بنایا؟

جواب         آپ ؐ نے بارہ آدمیوں کو نقیب بنایا جن کے نام یہ ہیں

                ۱؎                اسعد ابن زرارہ              ۲؎              اسید ابن حضیر                               ۳؎                ابو لہییثم ابن النیہان      ۴؎              براء ابن معرور

۵؎               عبد اللہ ابن رواحہ              ۶؎            عبادہ ابن صامت              ۷؎             سعد ابن ربیع                ۸؎               سعد ابن عبادہ

                  ۹؎              رافع ابن مالک                10؎            عبد اللہ ابن عمرو                ۱۱؎             سعد ابن حیثمہ                  ۲۱؎              منذر ابن عمر

سوال         جب مسلمان ہجرت کر کے مدینہ جانے لگے تو قریش نے کیا رویہ اختار کیا ؟

جواب        جب مسلمان ہجرت کرکے مدینہ جانے لگے تو قریش ان کی  راہ میں رکاوٹیں پیدا کرنے لگے۔

سوال         قریش کی رکاوٹوں کا مسلمانوں کی ہجرت پر کیا اثر پڑا؟

جواب        ان تمام رکاوٹوں کے باوجود مسلمان ایک ایک دو دوکرکے چھپ چھپ کرہجرت کرتے رہے۔

سوال         جب مسلمان ہجرت سے باز نہیں آئے تو قریش نے کیا کیا؟

جواب        جب مسلمان ہجرت سے باز نہیں آئے تو قریش نے دار الندوہ میں مشورہ کیا۔

سوال         دار الندوہ کیاتھا؟

جواب        دار الندوہ ایک جگہ تھی جہاں جمع ہوکر قریش اپنے مشورے کیاکرتے تھے۔

سوال          دار الندوہ کی مجلس کا صدر کون تھا؟

جواب        دار الندوہ کی مجلس کا صدر شیخ نجدی تھا۔

سوال          دار الندوہ میں کیامشورہ ہو ا؟

جواب        دار الندوہ میں یہ مشورہ ہوا کہ ہر قبیلہ کا ایک ایک آدمی مل کرجائے اورمحمدﷺ, کوایک ساتھ قتل کردیں۔

سوال         اس مشورے پر کس طرح عمل ہوا؟

جواب        مکہ کے ہرقبیلہ سے ایک ایک فرد آیا اور سب نے مل کر حضور ؐ کے مکان کا محاصرہ کرلیا۔

سوال           کافروں  کے محاصرہ سے حضورؐ  کس طرح نکلے؟

جواب        آپ ؐ نے حضرت علی کو اپنے بستر پر سلایا باہر نکلے اورایک مٹھی مٹی لے کر اس پرسورہ یٓس پڑھ کر دم کیا اورکفار کی طرف پھینک دیا سب آنکھیں ملتے رہ گئے اور آپ ؐ باہر نکل گئے۔

سوال         حضرت علی کوآپ ؐ  نے کیوں چھوڑ دیا؟

جواب        آپ ؐ کے پاس مکہ والوں کی کچھ امانتیں تھیں آپ ؐ نے وہ حضرت علی کے حوالے فرمایا او ر تاکید فرمائی کہ وہ امانتیں ان کے مالکوں تک پہونچادیں۔

سوال         گھر سے نکل کرآپ  ؐ کہاں تشریف لے گئے؟

جواب         گھر سے نکل کر آپ ؐ حضرت ابو بکر ؓ کے مکان پرتشریف لے گئے۔

سوال         حضرت ابو بکرؓ کے ساتھ آپ ؐ کہاں تشریف لے گئے؟

جواب          حضرت ابوبکر ؓ کے ساتھ آپ ؐ غار ثور میں تشریف لے گئے۔

سوال           غار ثور کیا ہے اور کہاں ہے؟

جواب        مکہ کے نشیب میں چار میل کے فاصلے پر ایک پہاڑہے جس کانام ثور ہے اسی پہاڑ کے اندر ایک غار(کھوہ) ہے جس کا نام غار ثور ہے۔

سوال         جب مکہ والوں کو یقین ہوگیا کہ آپ ؐ مکہ سے نکل چکے ہیں توانہوں نے کیا کیا؟

جواب        جب مکہ والوں کو یقین ہوگیا کہ آپ ؐ مکہ سے نکل چکے ہیں تو انہوں نے اعلان کرادیا کہ جو شخص محمد ؐ  کو زندہ یا مردہ پکڑ کر لائے گا اسے سو ااونٹ انعام میں دیئے جائیں گے۔

سوال          غار ثور میں آپ ؐ نے کتنے دن قیام کیا؟

جواب        غار ثور میں آپ ؐ نے تین دن قیام فرمایا۔

سوال         غار ثور میں اللہ تعالیٰ نے کفار سے حفاظت کا کیا انتظام فرمایا؟

جواب        غارثور میں اللہ تعالیٰ نے حفاظت کا یہ انتظام فرمایا کہ ایک مکڑی نے غار کے منھ پر جالا تان دیا اور ایک کبوتری نے گھونسلہ بناکر اسمیں انڈے دے دیئے۔

سوال           غارثور میں قیام کے درمیان مکہ کی.خبریں لاکر کون دیتاتھا؟

جواب        حضرت ابو بکر کے بیٹے عبد اللہ ابن ابی بکر کفار کے تمام حالات رات کوآکر بیان کر دیتے تھے۔

سوال         غار ثور میں کھانا کون پہونچاتاتھا؟

جواب        غار ثور میں حضرت ابوبکر کی بیٹی اسماء اور آپ ؓ کے بیٹے عبد اللہ کھانا پہونچاتے تھے۔

سوال         حضرت ابو بکر کے غلام عامر ابن فہیرہ کے ذ مے کیاکام تھا؟

جواب        عامر ابن فہیرہ کے ذمے تھا کہ وہ غار کے قریب بکریوں ؓ کو               چراتے رہیں اور آپ ؐکو بکریوں کا دودھ پلائیں۔

سوال         ہجرت کے سفر میں آپ ؐ نے راستہ بتانے کے لئے کس کو اجرت پررکھا؟

جواب        عبد اللہ ابن اریقط جو کفار مکہ میں سے ایک فرد تھا آپ ؐنے اجرت پررکھا۔

سوال         غار ثور سے مدینہ کے لئے کون کون آپ کے ساتھ روانہ ہوئے؟

جواب        غارثور سے مدینہ کے لئے حضرت ابو بکر، عامر ابن فہیرہ، اور عبد اللہ ابن اریقط آپ ؐ کے ساتھ روانہ ہوئے۔

سوال         ہجرت کے سفر میں آپ ؐ جس اونٹنی پر سوار تھے اس کانام کیا تھا 

جواب        ہجرت کے سفر میں آپ ؐ جس اونٹنی پر سوار تھے اس کا نام قصویٰ تھا۔

سوال         غار ثور سے مدینہ تک کا سفر آپ ؐ نے کتنے دنوں میں طے کیا؟

جواب        غار ثور سے مدینہ تک کا سفر آپ ؐ نے آٹھ دنوں میں طے کیا۔

سوال         قبا میں آپ ؐ کس دن پہونچے؟

جواب        ۸  ربیع الاول 14   نبوی دو پہر کو آپ ؐ قبا                پہونچے۔

سوال         قبا کیا ہے؟

جواب         قبا مدینہ سے چند میل کے فاصلہ پر ایک مقام ہے جومدینہ کا محلہ سمجھاجاتاتھا۔

سوال         قبا میں آپ نے کس کے مکان میں قیام فرمایا؟

جواب        قبا میں آپ ؐ نے کلثوم ابن ہدم کے مکان میں قیام فرمایا۔

سوال         حضرت ابو بکر ؓ  نے کہاں قیام فرمایا؟

جواب        حضر ت ابوبکر ؓ نے حبیب ابن وساف کے مکان میں قیام فرمایا۔

سوال         قبامیں آپ کس کے مکان میں مجلس فرماتے تھے؟

جواب        قبا میں آپ ؐ سعد ابن حیثمہ کے مکان میں مجلس فرماتے تھے۔

سوال          قبا میں قیام کے درمیان آپ  ؐ نے کون سا اہم کام انجام دیا؟

جواب        قبا میں قیام کے درمیان آپ ؐ نے ایک مسجد کی بنیادرکھی جو                اسلام کی سب سے پہلی مسجد ہے۔

سوال         قبا سے آپ ؐ کس دن روانہ ہوئے؟

جواب        قبا سے آپؐ  12 ربیع الاول 14  نبوی جمعہ کو مدینہ کے لئے روانہ ہوئے۔

سوال         مدینہ میں آپ ؐ نے پہلی نماز جمعہ کہاں ادا فرمائی؟

جواب        مدینہ میں بنو سالم ابن عوف کے محلہ میں آپ ؐ نے پہلی نماز                جمعہ ادافرمائی۔

سوال         مدینہ میں آپ نے کس کے مکان میں قیام فرمایا؟

جواب        مدینہ میں آپ  ؐ نے حضرت ابو ایوب ؓ کے مکان میں قیام فرمایا۔

سوال           جس جگہ مسجد نبوی کی بنیاد رکھی گئی وہ زمین کن کی ملکیت تھی؟

جواب        جس جگہ مسجد نبوی کی بنیاد رکھی گئی وہ دو یتیم بچوں سہل اور سہیل کی تھی۔

سوال         اس زمین کی قیمت کس نے اداکی؟

جواب         حضرت ابو بکر ؓنے اس زمین کی قیمت ادا کی۔

سوال         حضرت ابو ایوب انصاری ؓکے مکان میں آپ  ؐ نے کتنے دن قیام فرمایا؟

جواب        حضرت ابو ایوب انصاریؓ کے مکان میں آپ ؐ نے گیارہ مہینے اور چنددن قیام فرمایا۔

سوال         غزوہ بدرکب واقع ہوا؟

 جواب       غزوہ بدر17 رمضان   2 ھ  کو واقع ہوا۔

سوال         اس لڑائی میں مسلمانوں کی تعداد کتنی تھی اورکفار کی کتنی؟

جواب        اس لڑائی میں مسلمانوں کی تعداد تین سو تیرہ تھی اور کفار کی ایک ہزار۔

سوال         اسلامی لشکر کی کیاحالت تھی؟

جواب         اسلامی لشکر بے سرو سامانی کی  حالت میں تھا ان کے پاس  صر ف  دوگھوڑے اورستر اسونٹ تھے ہتھیار بھی سب پورے               نہیں تھے۔اورتعداد کے اعتبار سے کفار کے ایک تہائی تھے۔

سوال         لشکر کفار کی کیا حالت تھی؟

جواب        کافروں کا لشکر تمام ہتھیاروں سے لیس تھا سب زرہ پوش تھے اورتعداد میں مسلمانوں سے تین گنا زیادہ تھے۔

سوال         اس لڑائی کا نتیجہ کیا ہوا؟

جواب        اس لڑائی میں مسلمانوں کو فتح ہوئی اور کافروں کوشکست ہوئی۔

سوال         کتنے مسلمان شہید ہوئے؟

جواب        کل چودہ مسلمان شہید ہوئے۔

سوال         کافر کتنے مارے گئے؟ اور کتنے قید ہوئے؟

جواب        ستر کفار مارے گئے اور نوے قید ہوئے۔

سوال         قیدیوں کے ساتھ آپ ؐ نے کیا سلوک کیا؟

جواب        قیدیوں کے ساتھ آپؐ نے نہایت اچھا سلوک کیااورزر فدیہ لے کرسب کو آزاد کردیا۔

سوال         غزوہ بنی قینقاع کب ہوا؟

جواب        غزوہ بنی قینقاع 3ھ میں ہوا۔

سوال         یہ لڑائی کن لوگوں سے لڑی گئی؟

جواب        یہ لڑائی ایک یہودی قبیلہ بنی قینقاع سے لڑی گئی۔

سوال         اس لڑائی کا انجام کیا ہوا؟

جواب        اس لڑائی میں یہودیوں کو شکست ہوئی اور ان کو مدینہ سے                نکال دیا گیا۔

سوال         غزوہ احد کب واقع ہوا؟

 جواب        غزوہ احد 15  شوال  3ھ  میں واقع ہوا۔

سوال         احد کی  لڑائی   کے لئے آپ ؐ مدینہ سے کب روانہ ہوئے

جواب        احد کی لڑائی کے لئے آپ بعد بعد نماز جمعہ روانہ ہوئے۔

سوال         مدینہ سے چلتے وقت آپ ؐ کے ساتھ کتنے افراد تھے؟

جواب        مدینہ سے چلتے وقت آپ ؐ کے ساتھ ایک ہزار افرادتھے۔

سوال         لڑائی کے وقت آپ  ؐ کے ساتھ کتنے لوگ رہ گئے؟

جواب        لڑائی کے وقت آپ  ؐ کے ساتھ سات سو آدمی رہ گئے۔

سوال         تین سوا فراد کہاں چلے گئے َ؟

جواب          عبد اللہ ابن ابی اپنے تین سوساتھیوں کو لے کر واپس چلاگیا۔

سوال         عبد اللہ ابن ابی کون تھا؟

جواب         عبد اللہ ابن ابی منافقوں کا سردار تھا۔

سوال         ا حد کیا ہے اور کہاں ہے؟

جواب        احد ایک پہاڑ کا نام ہے جو مدینہ سے تین میل کے فاصلہ پرہے۔

سوال         لڑائی سے پہلے آپ  ؐ نے کون ساانتظاام کیا؟

جواب        لڑائی سے پہلے آپ ؐ نے پچاس تیر اندازوں کا ایک دستہ پہاڑکی پشت پر تعینات فرمایا۔

سوال         اس دستہ کے سردار کون تھے؟

جواب         اس دستہ کے سردار عبد اللہ ابن جبیر ؓتھے۔

سوال         احد کی لڑائی میں اسلامی جھنڈا کس کے ہاتھ میں تھا؟

جواب        احدکی لڑائی میں اسلامی لشکر کا جھنڈا حضرت مصعب ؓابن عمیر کے ہاتھ میں تھا۔

سوال         احد کی لڑائی میں آپ ؐ نے اپنی تلوار کس کو دی تھی؟

جواب        احد کی لڑاائی میں آپ ؐ نے اپنی تلوار حضرت ابو دجانہ ؓ کو دی تھی۔

سوال         کفار کے لشکر کی تعداد کتنی تھی؟

جواب        کفار کے لشکر کی تعداد تین ہزار تھی۔

سوال         حضور ؐ کے چچا حضرت حمزہ ؓکو کس نے شہید کیا؟

جواب         حضور ؐ کے چچا حضرت حمزہ کوایک حبشی غلام وحشی نے شہید کیا

سوال         جنگ احد میں مسلمانوں سے کیاچوک ہوگئی؟

جواب        جنگ احدمیں مسلمانوں سے یہ چونک ہوگئی کہ تیر اندازوں کا جو دستہ آپ ؐ نے پہاڑی پرمتعین کیا تھا اپنی جگہ چھوڑ کر بھاگتے ہوئےکافروں کا پیچھا کرنے لگے جس کی وجہ سے بازی پلٹ گئی۔

سوال         غزوۂ احد میں حضور ؐ کو جسمانی طور پر کیا نقصان پہونچا؟

جواب        غزوۂ احدمیں حضور ؐ کے دو دانت شہید ہوگئے۔

سوال         اس لڑائی کا انجام کیا ہوا؟

جواب        اس لڑائی کا انجام برابری کا رہا۔

سوال          اس لڑائی میں کتنے مسلمان شہید ہوئے؟

جواب         اس لڑائی میں69 مسلمان شہید ہوئے۔

سوال         غزوۂ بنونضیر کب ہوا؟

جواب        غزوۂ بنو نضیر ربیع الاول  4 ھ میں ہو ا۔

سوال         غزوۂ ذات الرقاع کب ہوا؟

جواب        غزوۂ ذات الرقاع جمادی الاول  ۴ ھ میں ہو ا۔

سوال         غزوۂ سویق کب واقع ہوا؟

جواب        غزوۂ سویق رجب  ۴  ھ میں واقع ہوا

سوال          غزوۂ سویق کے اور کون کون سے نام ہیں؟

جواب        غزوہ سویق کے یہ نام مشہور ہیں۔  غزوۂ بدر موعد۔غزوۂ بدرثانی۔      غزوۂ بدر صغریٰ ۔ غزوۂ بدر اخریٰ

سوال         غزوۂ دومۃ الجندل کب ہو ا؟

جواب        غزوۂ دومۃ الجندل ربیع الاول  ۵  ھ میں ہو ا۔

سوال         غزوۂ بنو مصطلق کب ہو ا؟

جواب        غزوۂ بنو مصطلق شعبان   ۵ ھ میں ہوا۔

سوال         غزوۂ خندق کب ہوا؟

جواب        غزوۂ خنددق ذی قعد ہ    ۵  ھ میں ہوا۔

سوال         اس غزوہ کانام خندق کیوں پڑا؟

جواب        اس غزوہ میں مسلمانوں نے اپنی حفاظت کے لئے مدینہ کے باہر خندق کھودا تھا اس لئے اس لڑائی کانام غزوۂ خندق پڑگیا۔

سوال         خندق کھودنے کا مشورہ کس نے دیا تھا؟

جواب        خندق کھودنے کامشورہ حضرت سلمان فارسی نےؓ دیاتھا۔

سوال          غزوۂ بنو قریظہ کب ہوا؟

جواب        غزوۂ بنوقریظہ ذی قعدہ    ۵  ھ میں ہو ا۔

سوال         بنو قریظہ سے متعلق فیصلہ کرنے کے لئے کس کو حکم بنایاگیا؟

جواب        بنوقریظہ کا حکم حضرت سعد ابن معاذ کو بنایا گیا۔

سوال         حضرت سعد ابن معاذ کو حکم کیوں بنایا گیا؟

جواب        بنو قریظہ نے خود کہاتھا کہ ہمارے فیصل سعد ابن معاذ  ہوں گے۔اس لئے آپ ؓ کو حکم بنایا گیا۔

سوال         حضرت سعد ابن معاذ نے کیا فیصلہ کیا؟

جواب        حضرت سعد ؓابن معاذ نے فیصلہ کیا کہ بنو قریظہ کے تمام مردوں کو قتل کردیا جائے اور اور ان کی عورتوں اوربچوں کے               ساتھ جنگی قیدیوں جیسا معاملہ کیا جائے اوران کی جائداد کومسلمانوں میں تقسیم کردیا جائے۔

سوال          آپ ؐ  عمرہ کے ارادے سے کب روانہ ہوئے؟

جواب        آپ ذیقعدہ     ۶ ھ میں عمرہ کے ارادے سے روانہ ہوئے۔

سوال         اس سفر میں آپ ؐ کے ساتھ کتنے صحابہ تھے؟

جواب        اس سفر میں آپ ؐ کے ساتھ چودہ سو صحابہ تھے۔

سوال         آپ ؐ عمرہ کیوں نہ کر سکے؟

جواب        مکہ والے لڑائی پر تیار ہوگئے اس لئے آپ ؐ عمرہ نہیں کر سکے۔

سوال         جب کفار مکہ لڑائی پرآمادہ تھے تو آپ ؐ نے لڑائی کیوں نہیں کی؟

جواب        آپ ؐ لڑائی کرکے حرمت مکہ کو پامال نہیں کرنا چاہتے تھے اس لئے آپ ؐ نے لڑائی کا حکم نہیں دیا۔

سوال         اس سفر کا کیا فائدہ ہوا؟

جواب        اس سفر کیا یہ فائدہ ہوا کہ کفار مکہ سے دس سال کے لئے صلح ہوگئی۔

سوال         اس صلح کا کیا نام ہے؟

جواب        اس صلح کا نام صلح حدیبیہ ہے اور قرآن نے اس کو فتح مبین بتایا ہے۔

سوال         حدیبیہ کیا ہے؟

جواب        حدیبیہ ایک جگہ کانام ہے جو مکہ قریب ہے۔

سوال         غزوۂ خیبر کب ہو ا؟

جواب        غزوۂ خیبر محرم     ۷  ھ میں ہوا۔

سوال         اس غزوہ میں مسلمانوں کی تعداد کتنی تھی؟

جواب        اس غزوہ میں مسلمانوں کی تعداد پندرہ سو تھی۔

سوال         خیبر کی لڑائی کاانجام کیا ہوا؟

جواب        خیبر کے یہودیوں نے نصف پیداوار کے خراج پر اطاعت کرلی۔

سوال         اس جنگ میں کتنے مسلمان شہید ہوئے؟

جواب         اس جنگ میں پندرہ مسلمان شہید ہوئے۔

سوال         غزوہ خیبر میں کتنے یہودی مارے گئے؟

جواب        غزوۂ خیبر میں 92  یہودی مارے گئے۔

سوال          فتح خیبرکے بعد آپ ؐنے کون سا اہم کام کیا؟

جواب        فتح خیبر کے بعد آپ ؐ نے بیرونی بادشاہوں کو تبلیغی خطوط لکھے۔

سوال         شاہ حبش کی طرف آپ ؐ نے کس کو بھیجا؟

جواب        شاہ حبش نجاشی کی طرف آپؐ نے عمر و ابن امیہ ضمری ؓکو بھیجا۔

سوال         شاہ روم ہرقل کے پاس کس کو بھیجا گیا؟

جواب        شاہ روم ہرقل کے پاس حضرت دحیہ کلبی ؓ کو بھیجا گیا۔

سوال         شاہ مصر مقوقس کے پاس کس کو بھیجا گیا؟

جواب        شاہ مصر مقوقس کے پاس حضرت حاطب ؓابن بلتعہ کو بھیجا گیا۔

سوال          شاہ بحرین منذر ابن ساویٰ کے پاس کس کو بھیجاگیا؟

جواب        شاہ بحرین منذر ابن ساویٰ کے پاس حضرت علاء ؓحضرمی کو بھیجاگیا۔

سوال         شاہ عمان کے پاس کس کو بھیجا گیا؟

جواب        شاہ عمان کے پاس حضرت عمر وؓ ابن عاص کو بھیجا گیا۔

سوال         شاہ یمامہ ہوزہ ابن علی کے پاس کس کو بھیجا گیا؟

جواب        شاہ یمامہ ہوزہ ابن علی کے پاس حضرت سلیط ابن عامری ؓ کو بھیجا گیا۔

سوال         شاہ دمشق حارث ابن الثمر غسانی کے پاس کس کو بھیجاگیا؟

جواب        شاہ دمشق حارث ابن الثمرغسانی کے پاس حضرت شجاع ابن وھب ؓ کو بھیجا گیا۔

سوال         شاہ یمن حرث ابن کلان حمیری کے پاس کس کو بھیجا گیا؟

جواب        شاہ یمن حرث ابن کلال حمیری  کے پاس مہاجرؓ ابن ابی امیہ کو بھیجا گیا۔

سوال         شاہ فارس کسریٰ کے پاس کس کو بھیجا گیا؟

جواب        شاہ فارس کسریٰ کے پاس حضرت عبد اللہ ؓابن حذافہ کوبھیجا گیا

سوال         ان خطوط کا کیا رد عمل ہوا؟

جواب        نجاشی شاہ حبش اور شاہ عمان آپ ؐ کا خط پڑھ کر مسلمان ہوگئے ہرقل شاہ روم نے آپ کے ایلچی کے ساتھ نہایت تکریم کامعاملہ کیا مگرسلطنت کی لالچ میں ایمان نہیں لایا مقوقس شاہ مصرنے آپ کے خط اور ایلچی کی بڑی عزت کی جوابی خط لکھااور ایک خلعت ایک خچراوردو لونڈیاں آپ کی خدمت میں بطورھدیہ بھیجامنذر ابن ساویٰ نے بھی عزت کا برتاؤ کیاشاہ  فارس کسریٰ نے آپ ؐ کے خط کو چاک کردیا اور عبد اللہ ؓبن حذافہ کے ساتھ نہایت گستاخانہ برتاؤ کیا آپ ؐ نے یہ سن کر فرمایا کہ کسریٰ کی سلطنت اسی طرح چاک کردی جائے گی  اورایساہی ہوا۔

سوال         آپ ؐ نے عمرۃ القضاء کب اداء کیا؟

جواب        آپ ؐ نے عمرۃ القضاء     ۸  ھ میں ادا کیا۔

سوال         اس سفر میں آپ ؐ کے ساتھ کتنے صحابہ تھے؟

جواب        اس سفر میں آپ ؐ  کے ساتھ دو ہزار صحابہ تھے۔

سوال         اس سفر میں آپ ؐ نے کس سے نکاح کیا؟

جواب        اس سفر میں آپؐ نے میمونہ ؓبنت حارث سے نکاح کیا۔

سوال         جنگ موتہ کب ہوئی؟

جواب        جنگ موتہ جمادی الاول    ۸  ھ میں ہوئی؟

سوال           جنگ موتہ   میں مسلمانوں کا مقابلہ کس سے تھا؟

جواب        جنگ موتہ میں مسلمانوں کا مقابلہ عیسائی بادشاہ قیصرروم سے تھا۔

سوال         آپ ؐ نے اس لشکر کا سردار کس کو بنایا تھا؟

جواب        آپ ؐ نے اس لشکر کا سردار زید ابن حارث ؓکو بنایا تھا؟

سوال         لشکر کو آپ ؐ نے کیا  ہدایت   فرمائی تھی؟

جواب        لشکر کو آپ ؐ نے یہ ہدایت فرمائی تھی۔ کہ اگر زید ابن حارثؓہ شہید ہوجائیں تو جعفر ؓابن ابی طالب لشکر کے سردار ہوں گے اوروہ بھی شہید ہوجائیں تو عبد اللہ ؓابن رواحہ سردار ہوں گے اور اگروہ بھی شہیدہوجائیں تو مسلمان جس کوچاہیں اپناسردار بنالیں۔

سوال         مسلمان لشکریوں کی تعدادکتنی تھی؟

جواب        مسلمان لشکریوں تین ہزار تھی۔

سوال         عیسائی لشکریوں کی تعدادکتنی تھی؟

جواب        عیسائی لشکریوں کی تعداد ایک لاکھ تھی۔

سوال         میدان جنگ میں جب تینوں سردار شہید ہوگئے تو مسلمانوں نے کس کو اپنا سردار بنالیا؟

جواب        تینوں سردار شہید ہوگئے تو مسلمانوں نے حضرت خالد ؓابن ولید کو اپنا سردار بنالیا۔

سوال         لڑائی کا انجام کیا ہوا؟

جواب        اس لڑائی میں عیسائی لشکر کو شکست ہوئی اورمسلمانوں کوفتح ہوئی۔

سوال           مکہ والوں نے کیا بد عہدی کی؟

جواب        بنو بکر نے مکہ والوں سے مل کر بنو خزاعہ کا قتل عام کیا  جو صلح حدیبیہ کے خلاف تھا۔

سوال         بنو خزاعہ کے فریاد پر آپ ؐ نے کیا جواب دیا؟

جواب         بنو بکر نے جب بنو خزاعہ پر حملہ کیاتھا تو انہوں نے فریاد کی کہاائے محمدؐہماری مدد کیجئے آپ ؐ کو اللہ نے غیب سے خبر دے دی جس کے جواب میں آپ ؐ نے فرمایا لبیک لبیک میں حاضرہوں میں حاضر ہوں

سوال         بنو خزاعہ کی طرف سے فریاد لے کر کون کون مدینہ آئے؟

جواب         بنو خزاعہ کی طرف سے فریاد لے کر بدیل ابن ورقہ اورعمر ابن سالم خزاعی مدینہ حاضر ہوئے۔

سوال         بدیل اور ورقہ کے ساتھ آپ ؐ نے کیا برتاؤ کیا؟

جواب        بدیل اور ورقہ کو آپ نے تسلی وتشفی دی اور کہا ہم تمہاری مدد کو ضرورپہونچیں گے۔

سوال         جب یہ لوگ واپس ہوگئے تو آپ ؐ نے کیا فرمایا؟

جواب        جب یہ لوگ واپس ہو گئے تو آپ ؐ نے فرمایا کہ ابو سفیان مکہ سے صلح کے لئے روانہ ہوچکا ہے لیکن وہ ناکام واپس جائے گا

سوال         مدینہ پہونچ کر ابو سفیان نے کیا کیا؟

جواب         مدینہ پہنچ کر ابو سفیان نے آنحضرت ؐ ابو بکر صدیق ؓ عمر فاروق ؓ اورعلی کرم اللہ وجہہ سے الگ الگ بات کرنی چاہی مگر کسی نے اس کو کوئی جواب نہ دیا۔

سوال         آخرابو سفیان   نے کیا کیا؟

جواب        آخر ابو سفیان نے مسجد نبوی میں کھڑے ہوکر اعلان کیا کہ میں صلح کی میعاد بڑھاتا اورعہد واقرار کو مضبوط کرتاہوں۔

 سوال        ابو سفیان کی روانگی کے بعد آپ ﷺنے کیا کیا؟

 جواب       ابو سفیانی کی روانگی کے بعد آپ ؐ نے لشکر اسلام کو کوچ کا حکم دیا۔

سوال         مسلمانوں کے حملہ آور ہونے کی خبر کس نے مکہ پہونچانے کی کوشش کی تھی؟

جواب        ایک صحابی حاطب ؓابن ابی بلتعہ نے مکہ والوں کو مسلمانوں کی حملہ آوری کی خبر مکہ پہونچانے کی کوشش کی تھی۔

سوال         حاطبؓ ابن ابی بلتعہ نے کس کے ہاتھ یہ خبر بھیجی تھی؟

جواب        حاطب ابن ابی بلتعہ نے ایک عورت کے ہاتھ یہ خبر بھیجی تھی۔

سوال         وہ عورت کیسے پکڑی گئی؟

جواب        اللہ تعالیٰ نے حضور  ؐ کو خبردی جس سے وہ عورت پکڑی گئی۔

سوال         پیارے نبی ؐ نے حاطب ابن ابی بلتعہ کے ساتھ کیامعاملہ فرمایا؟

جواب        پیارے نبی ؐنے حاطبؓ ابن ابی بلتعہ کو معاف کردیا۔

سوال         آخر حاطبؓ ابن ابی بلتعہ نے مکہ والوں کو خبردارکرنے کی کوشش کیوں کی تھی؟

جواب        حاطب ؓابن ابی بلتعہ کے کچھ عزیز مکہ میں تھے انہوں نے سوچاکہ اگرمیں مکہ والوں کو خبر کردوں تو شاید مکہ والے میرے عزیزوں کو تکلیف نہ پہونچائیں گے۔

سوال         مدینہ سے مکہ کی طرف روانگی کب ہوئی؟

جواب         ۱۱ رمضان    ۸ ھ  کو مدینہ سے مکہ کی طرف روانگی ہوئی۔

سوال         آپ ؐ کے ساتھ کتنے صحابہ کرام تھے؟

جواب        آپ ؐ کے ساتھ دس ہزار صحابہ تھے۔

سوال         راستے میں کون ایمان لائے؟

جواب        راستے میں جحفہ کے مقام پرحضرت عباس ابن عبد المطلب مع اہل وعیال ایمان لائے۔

سوال         لشکر اسلام کہاں جاکر خیمہ زن ہوا؟

جواب        لشکر اسلام وادی مر الظہران میں جاکر خیمہ زن ہوا۔

سوال          آپ ؐ نے مر الظہران میں طلایہ گردی کے لئے کس کو مامورفرمایا تھا؟

جواب        مرالظہران میں آپ ؐ نے طلایہ گردی کے لئے عمر فاروق ؓ کو کوایک دستہ دے کر مامور فرمایا تھا۔

سوال         طلایہ گردی کے درمیان حضرت عمر فاروقؓ کی ملاقات کس سے ہوئی؟

جواب        طلایہ گردی کے درمیان حضرت عمر فاروق کی ملاقات ابوسفیان سے ہوئی؟

سوال          حضرت ابو سفیان کو لے کر حضرت عمر فاروق کہاں گئے؟

جواب        حضرت ا بوسفیان کو لے کر عمر فاروق حضور ؐ کے پاس آئے۔

سوال         حضورؐ نے ابوسفیان کے ساتھ کیا رویہ اختیار فرمایا؟

جواب        ابو سفیان کو حضور ؐ نے ایک رات کی مہلت عنایت فرمائی۔

سوال         صبح کو ابو سفیان نے کیا فیصلہ کیا؟

جواب        صبح ہوتے ہی ابوسفیان ایمان لے آئے؟

سوال         ا ٓپ ؐ نے ابو سفیان ؓکی کیا عزت افزائی فرمائی؟

جواب        آپ ؐ نے ابو سفیانؓ کی یہ عزت افزائی فرمائی کہ یہ اعلان فرمادیا کہ جو شخص ابو سفیانؓ کے گھر میں پناہ لے گا اس کو امان دی جائے گی

سوال         امان کے لئے آپ ؐ نے اورکیا کیا اعلانات کروائے؟

جواب        امان کے لئے آپ ؐ نے اعلان کراوایا کہ جو شخص اپنے گھر کا دروازہ بند کرلے گا اس کو امان دیا جائے گااور جو شخص خانۂ کعبہ میں پناہ لے گااس کو بھی امان ہے اور جو شخص بغیر ہتھیارلگائے راہ میں ملے گا اس کو بھی امان ہے۔

سوال         مکہ میں آپ ؐ  کس طرح داخل ہوئے؟

جواب        مکہ میں آپ ؐ نہایت امن کے ساتھ داخل ہوئے۔

سوال         مکہ میں داخلہ کے بعد آپ ؐ نے سب سے پہلے کیا کیا؟

جواب        مکہ میں داخلہ کے بعد سب سے پہلے آپ ؐ نے سواری پر ہی خانۂ کعبہ کا طواف فرمایا۔

سوال         طواف کے بعد آپ ؐ نے کیا کیا۔

جواب        طواف کے بعد آپ ؐ نے وہاں موجود تمام بتوں کو باہر پھنکوادیا اور پھرعثمان ابن طلحہ سے خانۂ کعبہ کی کنجی لے کر داخل ہوئے اور چاشت کی نماز ادا کی پھر خانۂ کعبہ کے دروازے پر کھڑے ہوکر ایک تقریرفرمائی۔

سوال         آپ ؐ نے خانۂ کعبہ کی کنجی کس کو عنایت فرمائی؟

جواب        آپ ؐ نے خانۂ کعبہ کی کنجی عثمان ابن طلحہ کو عنایت فرمائی اورفرمایا کہ یہ کنجی تمہارے خاندان میں رہے گی۔

سوال         مکہ والوں کے ساتھ آپ ؐ نے کیا برتاؤ فرمایا؟

جواب        مکہ والوں کے ساتھ آپ ؐ نے نہایت نرمی کامعاملہ فرمایا اور سب کی معافی کا اعلان فرمایا۔

سوال         فتح مکہ کے دن آپ ؐ نے اپنا عمامہ مبارک کس کو عطا فرمایااورکیوں؟

جواب        آپ ؐ نے فتح مکہ کے دن اپنا عمامہ مبارک عمیر ابن وہب کو صفوان بن امیہ کے امان کے ثبوت میں عطا فرمایا۔

سوال         فتح مکہ کا کیا اثر ہوا؟

جواب        فتح مکہ کا یہ اثر ہوا کہ قبائل عرب جوق در جوق آکر مسلمان ہونے لگے 

سوال         فتح مکہ کے بعد آپ ؐ نے کیا اعلان فرمایا؟

جواب        فتح مکہ کے بعد آپ ؐ نے اعلان فرمایا کہ جو لوگ مسلمان ہوگئے ہیں وہ اپنے گھروں میں کوئی بت باقی نہ رہنے دیں۔

سوال         بنوکنانہ کے بت عزی کو کس نے توڑا؟

جواب         بنو کنانہ کے بت عزّٰی کو حضرت خالد ابن ولید نے توڑا۔

سوال         بنی ہذیل کے بت سواع کو کس نے توڑا؟

جواب         بنی ہذیل کے بت سواع کو حضرت عمر و ابن عاص نے توڑا۔

سوال         مناۃ نامی بت کو کس نے توڑا؟

جواب        مناۃ نامی بت کو حضرت سعد ابن زیداشہلی نے توڑا۔

سوال         غزوہ حنین کب واقع ہوا؟

جواب        غزوہ حنین فتح مکہ کے بعد شوال    ۸ ھ  میں واقع ہو ا۔

سوال          غزوہ حنین میں کن لوگوں سے مقابلہ تھا؟

جواب          غزوہ حنین میں ہوازن اور قبائل ثقیف سے مقابلہ تھا۔

سوال         اس لڑائی میں مسلمانوں کی تعداد کتنی تھی؟

جواب        اس لڑائی میں مسلمانوں کی تعداد بارہ ہزار تھی۔

سوال         غزوہ حنین کا کیا نتیجہ ہوا؟

جواب        غزوہ حنین میں مسلمانوں کو فتح اور مشرکین کو شکست ہوئی۔

سوال         غزوہ حنین میں مسلمانوں کو مال غنیمت میں کیا کیا ملا؟

جواب        غزوہ حنین میں چھ ہزار قیدی ۴۴ ہزار اونٹ ۴۴ہزار سے زاید بھیڑ بکریا ں چار ہزار اوقیہ چاندی مسلمانوں کو غنیمت میں حاصل ہوا۔

سوال          ہوازن کے قیدیوں کے ساتھ آپ ؐ نے اور مسلمانوں نے کیا برتاوکیا؟

جواب         ہوازن کے تمام قیدیوں کو آزاد کردیا گیا۔

سوال         مال غنیمت کی تقسیم کے بعد آپ ؐ نے کیا کیا؟

جواب        مال غنیمت کی تقسیم کے بعد آپ نے عمرہ ادا کیا۔

سوال         مکہ کا پہلا امیر کس کو بنا یا گیا؟

جواب        مکہ کا پہلا امیر عتاب ابن اسید کو بنا یا گیا۔

سوال         مکہ والوں کو تعلیم قرآن کے لئے آپ ؐ نے کس کو مامور فرمایا؟

جواب        مکہ والوں کو تعلیم قرآن کے آپ  ؐ نے  حضرت معاذ ابن جبلؓ کومامور فرمایا۔

سوال         عام الوفود کس سال کو کہا جاتاہے؟

جواب         عام الوفود   ۹  ھ کو کہا جاتاہے۔

سوال         اس سال کو عام الوفود کیوں کہا جاتاہے؟

جواب        اس سال عرب کے مختلف علاقوں سے بکثرت وفود آئے اورمسلمان ہوئے اس لئے اس سال کو عام الوفود کہا جاتا ہے 

سوال         جنگ موتہ کی ہزیمت کا انتقام لینے کے لئے غسانی بادشاہ نے کیا کیا؟

جواب         جنگ موتہ کی ہزیمت کا بدلہ لینے کے لئے غسانی بادشاہ نے ایک لشکرعظیم فراہم کی اور ہرقل روم سے امداد طلب کی۔

سوال         رومی فوج کی تیاریوں کی خبر سن کرآپ ؐ نے کیا کیا؟

جواب        رومی فوج کی تیاریوں کی خبر سن کر آپ ؐ نے بھی مسلمانوں کو جنگ کی تیاری کا حکم دیا۔

سوال         منافقین نے کیا شرارت کی؟

جواب        منافقین نے اسلام کے خلاف شازش کرنے کے لئے ایک مسجد بنائی جس کو قرآن میں مسجد ضرار کہا گیا ہے۔

سوال         آپ نے جنگ کے لئے چندہ کی اپیل کی تو مسلمانوں نے کیاکیا؟

جواب          چندہ کی اپیل کے بعد مسلمانوں نے اپنی حیثیت کے مطابق چندہ فراہم کیا۔ حضرت عثمان غنیؓ نے سوا ونٹ سوگھوڑے مع سازو سامان اور ایک ہزار دینار دیئے حضرت ابوبکرؓ نے اپنے گھر کا سارا سامان جمع کردیا اورحضرت عمر فاروقؓ نے اپنا نصف مال راہ خدا میں جمع کردیا۔

سوال          اسلامی لشکر کے لئے کتنے افراد تیار ہوگئے؟ 

جواب        اسلامی لشکر کے لئے تیس ہزار افراد جمع ہوگئے۔

سوال         مدینہ سے آپ ؐ کب روانہ ہوئے؟

جواب        مدینہ سے آپ ؐ رجب    ۹  ھ میں روانہ ہوئے۔

سوال         آپ ؐ نے مدینہ کا عامل کس کو مقرر فرمایا؟

جواب        آپ ؐ نے مدینہ کا عامل محمد ابن مسلمہ انصاریؓ کو مقررفرمایا۔

سوال          آپ ؐ نے اپنے اھل وعیال کی حفاظت کیلئے مدینہ میں کس کو چھوڑا؟

جواب        آپ ؐ نے اپنے اہل وعیال کی حفاظت کیلئے حضرت علی کو چھوڑا

سوال         تبوک پہونچ کر آپ ؐ نے کیا کیا؟

جواب        تبوک پہونچ کر آپ ؐ نے چشمۂ تبوک پرقیام فرمایا۔

سوال         جب عیسائی لشکریوں نے لشکر اسلام کی آمد کی خبر سنی تو انہوں نے کیاکیا؟

جواب        لشکر اسلام کی آمد کی خبر سن کر تمام عیسائی بھاگ کھڑے ہوئے

سوال         چشمۂ تبوک پر آپ ؐ نے کتنے دنوں قیام کیا؟

جواب        چشمہ ء تبوک پرآپ ؐ نے بیس روز قیام کیا۔

سوا ل         آپ تبوک سے کب واپس ہوئے؟

جواب         آپ رمضان     ۹  ھ  میں مدینہ کو واپس ہوئے۔

سوال         واپسی میں آپ ؐ نے کیا حکم صادر فرمایا؟

جواب        واپسی میں آپ ؐ نے منافقوں کی مسجد، مسجد ضرار کو جلا دینے کاحکم صادرفرمایا۔

سوال         مسجد ضرار کو جلانے کے لئے آپ ؐ نے کن کو بھیجا؟

جواب        مسجد ضرار کو جلانے کے لئے آپ ؐ نے مالک ابن و حشم سالمیؓ اور معن ابن عدی عجلیؓ کو بھیجا۔

سوال         صحابہ میں سے کون کون سستی کی وجہ سے شریک لشکر نہیں ہوئے ؟

جواب        صحابہ میں سے کعب ابن مالک، ضرارہ ابن الربیع، اورہلال ابن امیہ شریک لشکر نہ ہوئے۔

سوال         ان کے بارے میں آپ ؐ نے کیا حکم فرمایا؟

جواب        آپ ؐ نے تمام مسلمانوں کو ان تینوں سے بات نہ کرنے کی تاکید فرمائی۔

سوال         اللہ تعالیٰ نے ان کے بارے میں کیا فیصلہ فرمایا؟

جواب        پورے پچاس دنوں کے بعد اللہ تعالیٰ نے ان تینوں کی معافی کا اعلان فرمایا۔

سوال         سب سے پہلا امیر حج کس کو بنایا گیا؟

جواب        سب سے پہلا امیر حج حضرت ابو بکر صدیق ؓ کو بنایا گیا۔

سوال         حضرت ابو بکر ؓ کے ساتھ کتنے مسلمانوں نے حج کیا؟

جواب         حضرت ابوبکرؓ کے ساتھ تین سو مسلمانوں نے حج کیا۔

سوال         آپ ؐ حج بیت اللہ کے لئے کب روانہ ہوئے؟

جواب        آپ ؐ حج بیت اللہ کے لئے ذیقعدہ 10  ھ میں روانہ ہوئے

سوال         آپ ؐ مکہ میں کب داخل ہوئے؟

جواب        آپ ؐ  ۴ ذی الحجہ بروز اتوار مکہ میں داخل ہوئے؟

سوال         آپ ؐ نے اپنی طرف سے کتنے اونٹ قربان کئے؟

جواب        آپ نے اپنی طرف سے سوا ونٹ قربان کئے۔

سوال         اس حج میں آپ ؐ کے ساتھ کتنے مسلمان تھے؟

جواب        اس حج میں آپ ؐ کے ساتھ ایک لاکھ سے زیادہ مسلمان تھے۔

سوال         حضور ؐ کی علالت کب شروع ہوئی؟

جواب        29  صفر    ۱۱ ھ سے آپ کی علالت شروع ہوئی۔

سوال         آپ کی علالت کی خبر سن کرمفسدوں نے کیا کیا؟

جواب        آپ کی علالت کی خبر سن کر مفسدوں میں سے مسیلمہ ، طلیحہ، اسود اورسجاح بنت حارث نے نبوت کا دعویٰ کیا۔

سوال         ان لوگوں کا انجام کیا ہوا؟

جواب        اسود کذاب فیروز نامی ایک مرد مبارک کے ہاتھ سے مارا گیااور مسیلمہ کذاب وحشی کے ہاتھوں مار اگیا۔

سوال         جیش اسامہ کو آپ نے کب روانہ کیا؟

جواب        28  صفر   ۱۱ ھ کو آپ نے جیش اسامہ کوروانہ فرمایا۔

سوال         اسامہ ابن زیدؓ نے مدینہ سے نکل کر کہاں قیام کیا؟

جواب        اسامہ ابن زیدؓ نے مدینہ سے نکل کر مقام جرف میں قیام کیا۔

سوال         مقام جرف سے لشکر اسلام کیوں کوچ نہ کرسکا؟

جواب        آنحضرت ؐ کی علالت کو دیکھ کر لشکر اسامہ مقام جرف سے کوچ نہ کرسکا۔ 

سوال         آپ ؐ کی علالت کے درمیان مسجد نبوی کی امامت کس کے سپرد تھی؟

جواب        آپ ؐ کی علالت کے درمیان مسجد نبوی کی امامت حضرت ابوبکرؓ کے سپرد تھی۔

سوال         حضرت ابوبکرؓ نے آپ ؐ کی ایام علالت میں کتنے وقت کی نمازیں پڑھائیں؟

جواب        حضرت ابو بکرؓ نے آپ ؐ کی ایام علالت میں تیرہ وقتوں کی نمازیں پڑھائیں۔

سوال         آپ کی وفات کب ہوئی؟

جواب        آپ ؐ کی وفات دو پہر کے قریب 12 ربیع الاول ۱۱ ھ بروزسموارمطابق ۸جون 632؁ء کو ہوئی۔

سوال         وفات کے وقت آپ ؐ کا سر مبارک کس کی گود میں تھا؟

جواب        وفات کے وقت آپ کا سر مبارک حضرت عائشہ کی گود میں تھا۔

سوال         وفات کے وقت آپؐ کے زبان مبارک پر کیاا لفاظ جاری تھے؟

جواب        وفات کے وقت آپ ؐ کی زبان اقدس پر اَللّٰھُمَّ رَفِیْقَ الْاَعْلٰی جاری تھا۔

سوال         آپ کی وفات کہاں ہوئی؟

جواب        آپ کی وفات حجرہ عائشہ ؓمیں ہوئی۔

سوال         وفات کی خبر سن کر صحابہ کرامؓ کی کیا حالت ہوئی؟

جواب        وفات کی خبر سن کر صحابہ کرام حیران وششدر رہ گئے۔

سوال         وفات کی خبر سن کر حضرت عمر فاروق نے کیااعلان کیا؟

جواب        آپؐ کی وفات کی خبر سن کر حضرت عمر فاروق نے اعلان کیا کہ جو شخص یہ کہے گا کہ محمد ؐ  فوت ہوگئے میں اس کی گردن اڑا دوں گا۔

سوال         صحابہ کرام کی یہ کیفیت کیسے دور ہوئی؟

جواب        حضرت ابوبکر کی تقریر سے صحابہ کرام کی یہ کیفیت دور ہوئی۔

سوال         آپ ؐ کو کس نے غسل دیا؟

جواب        آپ کو حضرت علی نے غسل دیا۔

سوال         غسل کے وقت آپ ؐ کو کروٹ کون بدلتے تھے۔

جواب         غسل کے وقت حضرت عباس ؓاوران کے دونوں لڑکے آپ کو کروٹ بدلتے تھے۔

سوال         غسل کے وقت آپ ؐ کے جسم اطہرپرپانی کون ڈالتاتھا؟

جواب        غسل کے وقت آپ ؐ کے جسم اطہر پر حضرت اسامہؓ پانی ڈالتے تھے۔

سوال         آپؐ کی نماز جنازہ کیسے اورکہاں پڑھی گئی؟

جواب        آپؐ کی نماز جنازہ حجرہ عائشہ میں پڑھی گئی سب سے پہلے فرشتوں نے اس کے بعد آپ کے اہل بیت نے اور پھر عام مسلمانوں نے ایک ایک کرکے نماز پڑھی۔

سوا ل         آپ ؐ کو کہاں دفن کیا گیا؟

جواب        ا ٓپؐ کوحجرہ عائشہ میں دفن کیا گیا۔

سوال         آپ ؐ کی قبر کس نے بنائی تھی؟

جواب        آپ کی قبر مبارک حضرت ابو طلحہ نے بنائی تھی۔

سوال         آپ کو کن لوگوں نے قبر میں اتارا؟

جواب        آپ ؐ کو حضرت علیؓ، حضرت عباسؓ، حضرت قثمؓ، اور حضرت فضل نے مل کر قبر میں اتارا۔

سوال         آپ کا حلیہ مبارک کیاتھا؟

جواب        آپ نہ بہت لمبے تھے اورنہ پستہ قد رنگ گندمی پرملاحت سرخی مائل تھا سر مبارک بڑا داڑھی خوب بھری ہوئی بال سیاہ قدرے پیچیدہ آنکھیں گول بڑی سیاہ پر رونق سر کے بال اکثر کان کی لوتک اور کبھی کندھوں تک اور کبھی کان کی لو سے بھی اوپررہتے تھے۔ بھنویں باہم پیوستہ ایک باریک سی رگ درمیان فاصل تھی جو غصہ کے وقت ظاہر ہوجاتی تھی آنکھوں کی سفیدی میں سرخ ڈورے بھی تھے رخسار نرم اورپرگوشت تھے۔ سرمیں تیل ڈالتے اور آنکھوں میں سرمہ لگاتے تھے دانت مثل مروارید چمکدار تھے آپؐ کے دونوں شانوں کے درمیانمہر نبوت تھی۔

سوال         آپ ؐ کے کتنے بیٹے تھے ان کے نام کیا ہیں؟

جواب        آپ ؐ کے تین بیٹے تھے جن کے نام یہ ہیں                  قا سم،عبداللہ (انہی کا لقب طیب و طاہرتھا)ا              براھیم

سوال          آپؐ کی کتنی بیٹیا ں تھیں ان کے نام کیا ہیں؟

جواب        آپؐ کی چار بیٹیاں تھیں ان کے نام یہ ہیں زینب ؓ،  رقیہؓ،ام کلثومؓ،  فاطمہؓ۔

سوال         آپ کی ازواج کو کیا کہا جاتاہے؟

جواب        آپ ؐ کی ازواج کو امھات المومنین کہا جاتا ہے۔

سوال         ازواج مطہرات کی تعداد کتنی ہے ان کے نام کیا ہیں؟

جواب         ازواج مطہرات کی تعداد گیارہ ہے اور ان کے نام یہ ہیں

 ۱؎              خدیجۃ الکبریٰ                                ۲؎                سودہ بنت زمعہ                 ۳؎            عاشہ صدیقہؓ                   ۴؎             زینب بنت خزیمہ ؓ                           ۵؎                  حفصہ بنت عمر ؓ               ۶؎            ام سلمہ ؓ                       ۷؎             زینب بنت جحش ؓ              ۸؎             ام حبیبہ ؓ                                     ۹؎                صفیہ بنت حییؓ                ۰۱؎           میمونہ بنت حارث ؓ           ۱۱؎              جویریہ بن ت حرث ؓ

سوال         آپ ؐ کے گھوڑوں کے نام کیا ہیں؟

جواب         آپ ؐ کے گھوڑوں کے نام یہ ہیں  سکب، مرتجز، لحیف، لزار، طرب یاظرب،  سبحہ ،درد، ضریس، ملاوح۔

سوال         آپ ؐ کے خچروں کے نام کیا ہیں؟

جواب        آپ ؐ کے خچروں کے نام یہ ہیں  دلدل، فضہ ، ایلیہ۔

سوال         آپ ؐکے گدھے کا نام کیا تھا؟

جواب        آپؐ کے گدھے کا نام یعفور تھا۔

سوال           آپ ؐ کے اونٹنیوں کے نام کیا تھے؟

جواب         آپ ؐ کے اونٹنیوں کے نام یہ تھے  قصواء ، عضباء، جدعاء۔

سوال         آپ ؐ کے تلواروں کے نام کیاتھے؟

جواب         آپ ؐ کے تلواروں کے یہ نام تھے  ماثور، ذوالفقار، قلعی، تبار،حتف،قضیت ، غضب، رسوب، مجذم۔

سوال         آپ ؐ کے نیزوں کے نام کیاتھے؟

جواب        آپ کے نیزوں کے نام یہ تھے   مثویٰ۔ مثنیٰ، نیعہ، غمزہ،بیضا۔

سوال         آپ کی لاٹھیوں کے نام کیا تھے؟

 جواب       آپ کی لاٹھیوں کے نام یہ تھے محجن، عرجون، ممشوق۔

سوال          آپ ؐ کے کمانوں کے نام کیا تھے؟

جواب          آپ ؐ کے کمانوں کے نام یہ تھے     شداد،  زوراء،  روحاء،  صفراء،  بیضاء،  کتوم۔

سوال         آپ ؐ کے ترکش کے نام کیا تھے؟

جواب        آپ ؐ کے ترکش کے نام یہ تھے  موشح، ذو السبوع

سوال         آپ ؐ کے زرہوں کے نام کیا تھے 

جواب        آپ ؐ کے زرہوں کے نام یہ تھے۔           ذات ا لفضول، ذات الوشاح ،ذات ا لحواشی، سعدیہ، فضہ، تبرا، خریق